و الان مع برنامج(صباح الخير يا ليونز)

السلام عليكم و رحمة اللة و بركاتة



احمم احمم

الكاميرا مظبوطة يابنى
شايفنى عندك ولا اية انتا شكلك هاتتعبنى القصة معدولة و لا اية اوعى يكونو مش شامين ريحة البرفان الجديد و ابقى جيب الكاميرا على الجزمة كدا كل شوية عشان لسة جايبها جديدة دى غالية ها واخد بالك و حياتك لكون خاارب بيتك و.....

-يا باشا احنا على الهوا

مش تقول يا بجم و ربنا لاكون.....

- على الهواااااااااا

احم احم اعزائى المشاهدين اهلا بكم فى برنامج(صباح الخير يا ليونز) البرنامج الجديد جدااا و الممتع مع المقدم الشهير اللامع الى كان بيشتغل فى ال mbc طبعا سبتهم عشان اجيلكو هنا-احم المهم المذيع احمد الشهير ب(pit_bull) و هايكون انشاء اللة كل جمعة حلقة و معانا هاننزل الشارع و نشوف الناس بمشاكلهم و كمان هايكون معانا هنا فى الاستديو ضيوف فى برنامجنا من نجوم مجتمع الليونزى و نتناقش و نتحاور معاهم (من غير ضرب) انشاء اللة هايعجبكوم اكيد و اكيد معانا

(مش هاتقدر تغمض عنيك ولا ترمش حتى عشان ماتضربش)

و ندخل فى موضوع حلقتنا انهردة

انهردة نزلنا و رايحين على بيت نجمة من نجوم الليونز (انجل ميرو) لنصور عربية فول هيا زبونة عندها ارادت ان ننزل و نشوف حياة صاحب هذة العربية فانزلنا و نشوف مع بعض.



اعزائى المشاهدين والمشاهدات اليوم نحييكم من امام مش عارف بصراحه اسميه ايه بس عربية فول المعلم عتريس ادره
واللى مكتوب على وش العربيه عبارات اضحكتنى وكل فريق العمل وهى
"كل فول عتريس مش هتبطل تهييس"
"لو كلت من عتريس مش هتكون من المتاعيس""لو خلص الفول انا مش مسئول" "وان خلص الفول اطلبنى ع المحمول" ويبدو انه نسى يكتب الرقم

وفى بداية اللقاء معلم عتريس صباح الخير..

عتريس::صباح الفل ياباشا ...عاوز حار ولا عادى..
احمد: لا والله لاحار ولا سقعه انا جايلك فى موضوع اخر.

عتريس:أأمر ياباشا هتتكلم فى الرخصه يبقى اتوكل على الله..

احمد:ياعم لا لا انت فاهمنى غلط..

عتريس :طيب متفهمنى الصح ياسى الاستاذ..عاوزين نشتغل بئه..من صباحية ربنا مطلعناش غير 450 طلبيه..

احمد:بص يامعلللللم احنا جايين نصور معاك ...

عتريس::يعنى هطلع فى التلافزيييون والوليه هتشوفنى وانا بخرج الفول من الأدره والنبى يابيه صحيح...

احمد:ياعم ايوا والله مستعد ولا نجيلك يوم تااااانى..

عتريس: لا يابيه يوم ايه انا فجيت الساعه اللى اشتهر..

احمد:"بينى وبين نفسى " فاكر نفسه رايح mbc action..
عتريس :ايون يابيه اتفضل متيجى يابنى يابو كامرا انت كده وتجيب الصنايعيه اللى معايا وطلع العربيه ولا اكمنها مش باجيرو!! ايه دى مش كفايه رضينا نصور...

احمد:معلم عتريس قوللى شغلك من كام لكام؟؟؟

عتريس:والله يااستاذنا احنا بنسعى من بعد الفجر الى ان تخلص الادره..

احمد سعيد:ايه ااكتر الايام اقبالا على العربيه بتاعتك؟؟

عتريس: والله يابيه حسب الايام مش كله زى بعضه ..

احمد:ممكن توضح يامعلللللم؟؟

عتريس: يعنى يابيه مثلا زى الجمعه ده بتكون الناس اجازه ومفيش طلبه باخده اجازه وبيريح جنب الوليه والعيال,,اما بئه مثلا الحد والاثنين والثلاث والاربع والخميس الشغل فيهم نار اما يوم السبت اوقات واوقات بيجيلى الرجاله اللى نسوانهم مش طابخين ال ايه مهما لسه طافحين يوم الجمعه هياكلوا السبت كمان..

احمد:طيب معلم عتريس على كده شغلتك دى بتكسسسب ؟؟
عتريس:والله يابيه الحمد لله معيشانا والحمد لله باكل منها الشهد..متيجى تشتغل معايا والله شكلك لبق ووشك سمح وهتجلبنا زباين..

احمد:متشكر يامعلم لما اتر فد من الشغلانه دى هبقى اجيلك..


عتريس تنورنى يابيه..عربيتى تحت امرك فى اى وقت ..

احمد:شكرا يامعلم ..

عتريس:بس اكيد مش هتجيلى شييك كده لازم UnIfOrM الشغل ااااااه انا محافظ على سمعتى..

احمد:ماشى يامعلم " فى نفسى" وهو انا لبسى لبس هيفا ولا ايه مش عارف!!!

احمد:بقول يامعلم انت مشغل معاك كام واحد؟؟

عتريس: والله يابيه من غير حسد معايا 5 صبيان..

احمد:طيب ليه كل دول يامعلم..انت متعرفش تعمل كل ده لوحدك ؟؟؟

عتريس :يابيه العمليه مش سبهلله كده دى عمليه صعبه...هقووولك

احمد:اتفضل قووول و عرفنا...

عتريس :فى واد متخصص يجيبلى العيش من حين لاخر,وواد يغسل اوانى الزباين,,وواد يجيبلهم الميه لو حد زور,,وواد يقدم الطلبات,,هتقوللى طيب والواد الخامس ده بئه ليه!!! ده بئه شغلته يشوف مين اللى هيفلسع او هيمشى من غير ميدفع بعدين يقووول تيييييرااااارااااااا واروح انا زانقه بالذوووق واقوله مطرح ميسرى يمرى يابيه..

احمد: اااااااااااه عندك حق ربنا يقويك..

عتريس :مش قولتلك صعبه يااستاذ..

احمد:اكتر ايام شغلك امتى يامعلم؟؟

عتريس: والله يابيه بتكون ايام الامتحانات بتكون مزهزهه اوى والحاله ماشيه موز وعنب ولو فى بطيخ كمان ,,العيل من دووول يسهر لحد الفجر يذاكر وبعدين يروح يصلى وتلاقى بئه تتار جايين عليا ,,خمسه وخميسه طبعا ..

احمد:يعنى ايام الامتحانات الموسم بتاعك؟؟

عتريس :طبعا ياباشا ده انا لو قولتلك انى مهتم بتواريخ الامتحانات مش هتصدقنى ده انا بكتب تواريخ امتحانات كل صف وهيخلصوا امتى كمان...


عتريس:كله من اجل العلم والتعليم والطلاب برضه"ربنا يوفقهم"...

احمد:معلم عتريس ممن تذكرلنا موقف عجبك مع احد الزباين ؟؟

عتريس: يابيه هو انا بكون شايف حد اصلا انا بكون فى عمل مستمر مش بشوفه الا لما بيحاسبنى..وبحبه اوى لما يقوللى خلاص مش عاوز باقى...

احمد: طيب موقف مزعلك ...

عتريس:موقف مزعلنى ..موقف مزعلك ياعتره"بيكرش فى راسه" ايوا يابيه افتكرت كان فى زبون جه طلب شويه"يعنى طبق بلغة العربيات" قبل كده وادانى 20 جند ونسى الباقى ..

احمد:طيب مجالكش تانى ؟؟

عتريس: لا بييجى كل يوم..

احمد:طيب مدتلوش ليه باقى حسابه...

عتريس: والله يابيه محرج منه مش قادر اواجهه بالحقيقه وبعدين مهو اللى مبيعرفش يعد وانا مالى بئا..

احمد:حقيقة ايه اللى هتواجهه بيها!! انت هتقوله عليك فلوس...ده حقه ياعم فلوووووووووووسه...

عتريس:بس انا بردهمله بطريقه غير مباشره لحد مخلصهم انا عندى ضمير برضه..

احمد:ازاى يعنى؟؟

عتريس:يعنى مره اقوله خلى يااستاذ وهو ميرضاش اخلى الواد يزودلوا الميه,, اديله حبيتين فول زياده ,,واما تفتح كرم معايا اديله فحل بصل اخضر ..والله مش مع اى حد يابيه..ده لو مراتى مدت ايدها على فحل من غير مااعرف لكون مطلقها...

ميرو "زبونه" :وسع ياعم كده شويه بالبتاع اللى فى ايدك ده هتعملوا علينا حوار الكاميرا الخفيه..

ميرو: صباح القشطه ياعتره والنبى ياعم عتريس شويه حار وحيات والدك.

عتريس:حاضر يابنتى.

عتريس:انما انتى يا ميرو يابنتى عملتى ايه امبارح كنت شايفك راكبه البوكس كده..

ميرو: والله ياعم عتريس الواحد اتخنق ع الاخر من المدرسه والمدرسين ومنك ومن المذيع الخنقه ده ,امبارح الابله بتاعت الاحياء بتتكلم عن تحديد النسل,,تمام..!!!

عتريس:معاكى يامعلللللمه ,,عاوزه بصل طبعا..

ميرو:ايه ياعم عتريس طبعا الواحد لسه صاحى وعاوزين نغير ريحة البق المعفن ده..ده انا مدمنة بصل ياعم..المهممممم

عتريس:ها وبعدين ايه اللى حصل..

ميرو:بعدين بينى وبينك الكلام معجبنيش قولتلها اومال احنا بنتجوز ليه,,هو انتى يعنى عشان جوزك بايت ليل ونهار بره البيت هتيجى تقرفينا..

ميرو: اااااااال ايه ياعم عتريس قالتلى انتى قليلة الادب..

ميرو:بذمتك كده ابقى قليلة الادب..

عتريس:لا طبعا ده هو ده عين الادب.

ميرو:روحت مبونالها ومبكسلها بونيه هنا وبوكس هناك ولسه هطلع الموس جومانجى صحبتى مسكتنى ونقذتها منى كان هيبقى يومها بامبا مسخسخ..

عتريس:انتى مش شايفه البنطلون بتاعك مقطوووع..

ميرو:هتغلط ولا ايه ياعم عتريييس بدل مكشفلك فى وشك ع الصبح..

ميرو:دى موضه اسمها موضة المقطع..

عتريس:والمدير بيسيبك تدخلى المدرسه كده؟؟

ميرو:مدييير !!!وهو المدير هيشوفنى فين بس ..انا مظبطه مع الفراش اللى على الباب مهو اتاكل منى كذا مره قبل كده ..بس بغمزه فى المواسم وبيعدينى ياعم..

ميرو: وبعدين ايه قلة المزاج دى ع الصبح انت لكلك لكلك النهارده معايا كتير اوى ...فيييين الفول ياعم..

عتريس:ااااادى الفول صحه وعافيه..

ميروا: "بعد مكلت" اااااااااااااااااااااء "اتكرعت" صحه ياوحش..

ميرو:عاوز حاجه ياعم عترستو يلا بيييس يامان اسيبك تفول للناس بئه سلام ياماااااان..

احمد:خدى يابنتى هنااااا

ميرو: مين الى مستغنى عن عمرة الى بينادى دا اة هوا انتا بنتككككككك يانهارك ملحوس

ميرو:اسمى ميرو يادكتره

احمد:طيب بقولك ياانسه فيرو انتى ليه لمضه وبلطجيه كده..

ميرو:فيرو اية بس انتا كمان بعدين مالك ياعم فى ايه اقف بالشقلوب واتكلم عدل بقلك اهوووه..

احمد:ماشى بس انتى مش حاسه انك بنت؟؟

ميرو:يعنى ايه هتغلط انت اطسيت فى نواظيرك..بنت طبعا وست البنانيييت.

احمد:بس انتوا سموكوا الجنس اللطيف,والجنس الناعم..يعنى المفروض تكونى كده مش مقطع ولماضه..

ميرو:معاك حق والله...انا متاسف يااستاذ

احمد:لا مفيش اسف بس صلحى من نفسك شويه لانك باين عليكى بنت رقيقه جدا بس الزمن اللى بهدلك..

ميرو:والله كلامك حلو ومعاك حق فى كل كلمة ..ومن النهارده بجد هغير نفسى وهصلى وهصوم رمضان الجاى ده غير كل سنه وهحفظ قران,وهسيب اصحابى اللى مش كويسين وهتصاحب على المجتهدين بجد زى كنزى و جومانجى و فيكى و البنات الحلوة دى..وعد منى والله...........وعيطت ميرو وقالت سلام عليكم

عتريس:والله يابيه متاسف اوى بس دى البلطجيه بتاعت المدرسه دى كلها الثانويه اللى ادامنا دى على طووول..

احمد:سمعت ياعم بوانى وبوكسيات واااااااااء ومقطع.. باين عليها ياعم ربنا يكفينا شرها دى عاوزالها حلقه فى البرنامج دى بس تكون متخدره لحسن تبهدلنا ياعم..بس خلاص ان شاء الله هتبقى كويسه باين عليها صادقه جدا ربنا ياخد بايدها هى وكل اللى زيها..

احمد:معلم عتريس ممكن ندخل بيتك شويه!!

عتريس:ازاى يااستاذ تدخل بيتى وانا مش موجود والوليه لوحدها فى البيت!!

احمد:مش قصدى يامعلم ..قصدى نتكلم عن معاملاتك فى البيت..

عتريس :طيب متقول كده..فهمتك غلط!!

عتريس:انا فى البيت بينى وبينك مش مخليهم عاوزين حاجه الكدب خيبه..

احمد :ازاى يامعلم؟؟


عتريس::يعنى يابيه الوليه اول منزلت حاجه اسمها سجاده كنت جايبهالها تسمع عنها ولا بلاش احراج؟؟!!,,مفرش الغساله كانت اول واحده مغطيه غسالتها ,,طفاية السجاير كنت اول واحد مدخلها بيتى.....


احمد:"باستغراب"!! بس الطفايه دى ليك انت مش ليها.

عتريس:لا حد الله انا مبشربش بس انا جايبهالها هى..

احمد:هى !! ازاى يامعلم هى المدام بتدخن..

عتريس:ايه يااستاذ انت واقف مع عتريس عجرم!! لا طبعا هو انا اسمحلها بس صحباتاها بيدخنوا ..

احمد:ااااااااااااه ونعم الصداقه.وقعت قلبى ياراجل..

احمد:معلم انت فعلا شرفتنا فى الحلقه دى ونتمنالك زباين كتير وربنا يكتر من الامتحانات والملاحق كمان..


عتريس:شكرا يابيه انا فعلا عارف انى شرفتك ويارب زباين كتير وانا بطالب المسئولين يوسعولى المكان شويه عشان السيدات واهى الوليه تبعد شويه عن التلافزيون..وتيجى تشتغل معايا فى قسم السيدات..والبنات الطلبه المتفوقين زى المعلمه ميرو كده..

احمد:سيادتك عندك تلفزيون يامعلم..مقولتلناش على دى..

عتريس:لا يااستاذ بتروح عند جارتنا تتفرج وانا بأكل جوز الوليه وولادها ببلااااش..


احمد:بنشكرك عم عتريس وتحب تقول حاجه للمشاهدين قبل منغور ونمشى..


عتريس:والله بشكرهم ويارب تكون الوليه مراتى الدزمه تكون شايفانى واقولها قومى بئه حضرى الديك الرومى عشان شويه وجاى..وجهزى الشمععع هه الشمعععع..

احمد:شمع ايه يامعلم احنا على الهوا!!

عتريس:الشمع يابت عشان عيد ميلاد امى النهارده هه امممممى..

احمد:شكرا معلم عتريييس واتمنالك التوفيق..

الواد الخامس:تيييييييرراااااااااارررررااااااااااااا


عتريس :طيب اهرب انت دلوقتى عشان فى واحد هيخلع من الحساب هطلع عين*** سلالوووووووووووووووووز..

ملحوظة :جاى على الغلبان وهيطلع عين***و ميرو كلت وقالت فى وشه أأأأأأأأء وقالتله بيس" ومدفعتش فعلا هى دى الرجاله...

وفى نهاية البرنامج نتمنى لكم مشاهده ممتعة و طيبة وبجد شرفتونا
كان معكم محدثكم احمد (pit_bull) من امام.......
"عربية فول عتريس" الله لا يكسبه

و السلام عليكم و رحمة اللة و بركاتة و نراكم فى حلقة اخرى باذن اللة

تشششششش

احمد:خلاص نزلنا من على الهوا

المصور:اة يا استاذ احمد

احمد:استاذ احمد ها دلوقتى بتحترمنى يا..... انا مش قلتلك ياض عاوز الجزمة تظهر ها

طاخ طيييييييييييييييخ جبنة و فطير و حجات بطير

انتوا لسا هنا خلاص الحلقة خلصت روحوا بقى

يععععع يعععين تلاتة كمان
اكيد انا مش البت دى خالص
حرام عليك يابيت بول لية كدة
وحتى ياراجل لو انا هى مش عيب تيجى تفضحنى ادام كل اليونزات واليونزين بعد العشرة دى كلها
مكنش عيش وفول ومحليين ببصل (يعععع فى حد ياكل بصل وكمان على الصبح كدة)
بس خد بالك بقى من نفسك انت شفت اللى حصل للمدرسة ودورك جاى
وكمان هعملك حذر تجوال فى السايت واللى هيرد على موضوع ليك وبالذات دة هينضرب
بس شكلى كدة هتوب وارجع الى الله على يدك
وميرو الجديدة بقى بتقول سوووووووو نايس توبيك
دمة خفيف ولذيذ جدا
تسلم ايدك

هههههههههههه
نكته يا احمد عسل جدا الموضوع دا
بس بص بعد متقرأ ردي ابقي احذفه لاني شوفت فوق ان معمول حظر علي مواضيعك وكدا

لحد متصرف واشوف حد من اداره الموقع بقا


بالمناسبه فين عربيه عم عتريس علشان ناوي انا وشنيو نفتح فرع جمبه للصيدليه بتاعتنا

ههههههههههههههههههههههه
و الله موضوع جامد يا احمد

و انا اللى كنت مفكرها البنوته الرقيقه دى يا نهار ابيض

اللى تحسبه موسى يطلع فرعون

و بص يا احمد اعمل اللى تعمله فى السايت و انا اللى قايلك و تعالوا يا عيال ردوا يلا العمر واحد و الرب واحد و رزقى و رزقك على الله و ربنا مبينساش حد و كل كبير فى اللى اكبر منه

هههههههههههه

نايس توبيك

ههههههههههه

ايه التشريد دا

بس انا علشان ارد علي الموضوع دا جبت ورده وقعدت اقطف في ورقها ارد مردش ارد مردش بتحبني مبتحبنيش وقفت عند مبتحبنيش قولت ارد بقا

موضوع نكته يا احمد

انجل ميرو

هههههه
كدا يا ميرو هاتعملى فيا انا كدا هههههه مش انتى الى طلبتى نروح و نصور
اللة يسامحك و مش قلنا تبقى بنوتة حلوة بقى كدا و ادتينا وعد
و انا متاكد انك بنوتة جميلة طبعا مش عاوزة كلام

منورانى يا قمر شكرااا ليكى و ابقى عدى تانى عشان تشوفى الحلقة الى جية يا رب تعجبك.
----------------------
za myth

ههههههه هاتتخلى عنى مكنش العشم يا ابوحميد دانا قلت هاتدخل بقى و تقولي بقين جامدين كدا و صور يا احمد الى انتا عاوزة ولا يهمك و بتاع يلا العمر واحد و كلة فى سبيل المجتمع الليونزى...هههه هاتلاقى العربية جنب بيت ميرو بلظبط و لما تعملها ليك حلقة معانا يا بوب ماتقلقش جية فى الطريق....

منورنى ياابوحميد بجد شكرا ليك و عدى علينا مرة تانية عشان تشوف الحلقة الى جية يارب تعجبك ......
--------------------------
sheneo

هههههههه خد يابنى نص جنية صعبت عليا و اللة هههههههه

هيا دى الرجولة بس يارب ميطلعش كلام و متطلعش تجرى اول مايحصل حاجة

منورنى يا شينيو و اللة شكرا ليك و عدى علينا تانى عشان تشوف الحلقة الى جية يارب تعجبك .....
-----------------------------
mafia

ههههههه اوعى تخاف ولا تتهز عيب و خليها على اللة حد واخد منها حاجة

منورنى يا بوب بجد شكرا ليك و عدى علينا تانى عشان تشوف الحلقة الى جية يارب تعجبك...

احمد: الميك شغال يلا

المصور: اة يا استاذ احمد

احمد:ناس مابتجيش غير بلعين الحمرا..لازم تضربوا عشان تتعدلو

المصور: اللة ماطولك يا روح(يارب خدو بقى)

احمد: بتقول حاجة يلالالالا

المصور: لا يا استاااااذ احمد

احمد: اة بحسب...ولا انتا خنقتنى روح جبلى حاجة ساقعة اشربها انا سيحت من الشمس و رجليا لزقت فى الاسفلت..بقالنا خمس سعات مستنين عم احمد يجى يفتح الصيدلية قلنا خمس دقايق بلبس و جى شكلة بيلبس الدولاب ولا نام فية ولا اية...

المصور: معلش الغايب حجتة معاة

احمد: انتا مالك يلا بقولك اية ياض انا اتخنقت منك و من البرنامج دا انا هامشى من هنا

المصور: الحمد للة(احمدك يا رب)

احمد: انتا بتقول حاجة ياض...طب تصدق بقى انى قاعدلك و هاقرفك فى عيشتك يا....

ابوحميد(za myth): السلامو عليكوم اهلين اهلين يا شباب عاملين اية

احمد: احمدك ياااا رب انا كنت بدات افقد الامل ازيك يا دكتور عامل اية

ابو حميد : تمام الحمد للة شفت متاخرتش عليك اهو فى السريع السريع

احمد: لا خالص دنا قلت كمان انتا جيت بدرى(لطعنى فى الشمس ساعتين يا مفترى و تقولى سريع امال لو بطىء هاتعمل اية دى السنة فاتت)

احمد: امال شينيو جى امتى من المشوار بتاعة

ابوحميد: انا كلمتة قالى لما اعرف هاقولك قام مدينى اتنين ميسد و واحد بليز كول مى قال ياعنى بيقولى كمان ساعتين و نص انتا عارف بقى شينيو و الرصيد

احمد: طيب يلا افتح انتا و ظبط نفسك عقبال مانبتدى البرنامج و نجيلك.

ابوحميد: اوك


احم احم

اعزائى المشاهدين و المشاهدات نحييكم مرة اخرى فى برنامجنا (صباح الخير يا ليونز) نحييكم من امام صيدلية (الهلاك) و دى طبعا زى ماكلنا عارفين مشروع الدكتور احمد(za myth) و الدكتور(sheneo)...

و انا داخل لفتت انظارى بعض العبارات على نافذة الصيدلية تقول:
(لو نفر او حتى عدد هاتدخل فار تطلع اسد) ( اى حاجة بجنية) ( لا سحر ولا شعوذة حقنة و نطلعك اخر صهللة) (حبايبى الحلوين هنا تجد كل شىء من اول اللبوس حتى الانسولين).

و فى بداية اللقاء ازيك دكتور احمد:

ابوحميد: الحمد للة و كلو تمام

احمد: قلى يا ابوحميد بتفتو الساعة كام

ابوحميد: حسب المزاج ملاناش معاد محدد سعات نفتح الصبح و سعات بليل

احمد: حسب المزاج ازاى طيب و الى جة و كان عاوز يجيب دوا ولا حاجة يعمل اية

ابوحميد: محنا معرفين زباينا الى يجى و يلاقينا قفلين يضربلنا ميسد و احنا نيجى نديلة الى هوا عاوزة

ابوحميد:امال اية احنا مريحيين الزباين عندنا على الاخر و المنطقة عرفانا يعنى

احمد(اة لا باين) طيب قولى بقى نظامكم مين بييقف امتى و كدا انتا و شينيو و مظبطنها ازاى و كدا.

ابوحميد: تظبيط اية ياعم احنا مابنحبش نخنق بعض الى لية نفس بينزل و سعات بنعمل قرعة.

احمد: لا ربنا يوفقكم.

احمد: طيب قلى اية حكاية المشروع معاكم و ازاى اتولد

ابوحميد: وربنا ما ابنى انا جيت لقيت المحل دا هنا دحنا حتى ماجرينو

احمد:ابنك اية بس لا قصدى يعنى ازاى ابتديتو و كدا

ابوحميد:اقولك انا...انا اتخرجت انا و شينيو زى كل الشباب طبعا و رجلينا دابت من كتر اللف على الشغل و احنا كان حلمنا من زمان بصراحة ان احنا نفتح صيدلية تكون بتعتنا بقى و نعمل الى احنا عايزينو انتا عارف بقى راحة...

رحنا جميع المصالح الى بتساعد الشباب و كدا الى بتقعد تيجيلك على التلفزيون دى و شبابنا و ارضنا و عرضنا و مصر عمتنا و الحوارات دى رحنا يا سيدى و قدمنا على طلب قرض...طبعا انتا عارف اية الى حصل ماجلناش رد طبعا و اقعد سنتين جنب والدك لغاية مايجيلك عدلك..

احمد: طب عملتو اية؟

ابوحميد: شينيو قالى لا يا احمد مش هاينفع كدا لازم نعمل حاجة انا ابويا بدا يلقح كلام عليا و بقفش منو اتنين جنية بلعافية عشان انزل.. كان الواد احمد(never to meet) جرنا هنا داخل فى جمعية و بتاع و قبلنا و قلنا عليها و دخلنا معاة قعدنا سنة جمعنا شوية فكة حلوين قلنا ناجر محل شهرين و نجيب كام ازازة دوا على كام ابرة و ربنا يبقى يحلها...و الموضوع مشى الحمد للة و خلاص هانفتح فرع تانى اهو قريب انشاء اللة و كل دا على السمعة طبعا....

احمد: لا قصة كفاح جامدة ربنا يوفقكم

زبون: السلام عليكم

ابوحميد: وسع كدا يا عم زبووووون... اتفضل يا حاج نعم

زبون: بقولك يا دكترة انا صحيت انهردة الصبح لاقيت بطنى واجعانى جدا و انا نايم لا مؤاخذة بتبهدلنى انا و مراتى و احنا نايمين بس يعمل مفعول بسرعة و النبى لحسن مراتى فى الانعاش دلوقتى و راتيها مسدودة.

ابوحميد: لا ولا يهمك يا حج عندى الحل عيب عليك...ورينى ودنك كدا

الزبون: اهى

ابوحميد: هاحطلك قطرة فيها انما اية الى هيا خد دى تحط منها كل ساعة تلات مرات و هاعدى عليك بكرة اديك حقنة فى رجلك و هاتظبطك و تخليك زى الفل...

الزبون:ربنا يخليك يا دكترة و اللة ماعارف اقولك اية..شكراااااااا

احمد:شكرا شكرا اية يا مجنون اية يا عم الى انتا عملتو فية دا

ابوحميد: اية انتا مالك انتا اية دخلك

احمد: اية دخلك اية قطرة فى الودن اية و حقنة فى الرجل ..الراجل بقولك بطنو بتوجعو اية جاب ودنو فى الموضوع...

ابوحميد: مدام مابتفهمش فى الحجات دى ماتتكلمش..كل حاجة فى الجسم فاتحة على كلو و كلو بينفذ على كلو مش بدل اديلو دوا طعمو وحش ولا لبوس لامؤاخذة يوجعو..

احمد: ينفذ اية و مفتوح اية هوا جى يشترى شقة...

ابوحميد: يا عم هوا كدا و هاتلاقية جى بكرة يقولك تمام هى دى الناس ياعم مابتفرقش معاها حاجة جت على دى ياعنى بياكلو عيش فية خشب و مية لونها اسود من كتر العفانة و بيكحو تراب و هباب اسود الصبح من دخان العربيات و هاتيجى على دى... الشعب دا اصيل يا عم الحج ولا بيهمةةةة

شينيو: السلاموووو عليكووووووو

شينيو: اية يا حمااادة اتاخرت عليك معلش مفتحتش الصيدلية الصبح بقى كان عندى مشوار مهم

ابوحميد:لا ولايهمك

شينيو: اللة احمد عندنا ازيك عامل اية يا برنس و كيف اخبارك معلش اتاخرت عليك

احمد: لا ولا يهمك

احمد: قلنا بقى اية المشوار الى اخرك دا

شينيو: مافيش يا بوب كان فية كذا زبون كدا عديت عليهم حقنتهم و جيت

احمد: انتو بتروحو البيت كمان

شينيو: امال اية يابابا اهم حاجة راحة الزبون هوا عيان و هانتعبة اكتر.. نروحلو نديلة الى فية النصيب و نخلع و هكذا..

احمد: ياعنى اية تديلة الى فية النصيب.

شينيو: شكلك هاتتعبنى الراجل دا بيكلم كتير لية يا ابوحميد اية الى جابة

ابوحميد:معلش هانعمل اية اهو هايطلعنا فى التلفزيون و هانتشهر بقى استحملة

شينيو: مااااشى..بص يا عم الحج الزبون بيتصل يقولنا على حالتة و انو ميقدرش يجى اقوم انا واخد شنطة العدة و رايح اشوف حالتة و اديلو ازا كان دوا او حقنة و خلاص..

احمد: توصيل طلبات ياعنى

شينيو:(شكلك مخك تخين و هاتتعبنى) ايوووووووووووة حاجة كدا

شينيو: بقولك اية انتا شكلك هفتان كدا و عدمان و وشك مدى على اصفر انا عندى ليك ازازة مش هاتلاقيها فى اى حتة مابتنزلش غير عندنا هاديك صندوق تاربع ازازة كل تلات سعات و انتا هاتبقى فل الفل.

احمد: بلا ازازة بلا بتاع ..انا زى الفل الحمد للة شكرا

شينيو: اسمع كلامى بس..انتا مش واثق فينا ولا اية..

احمد: لا ازاى بقى..واثق طبعا ..بس شكرا

شينيو: داحنا عاملينة هنا اسمع كلامى

احمد: عاملينة هنا ازاى!!!!

شينيو: اصل احنا عندنا مختبر ورا هنا بنخترع فية ادوية و كدا عقبال عندك و مجمعين كذا عيل من الحتة هنا بيساعدونا

احمد: كام عيل بيساعدوكو طيب الحجات دى بتختبروها ولا اية

شينيو: طبعاااا...على العيال الى بتشتغل هنا

احمد: طيب دى وزارة الصحة بتشوفها ياعنى ولا بتوزعوها كدا

شينيو: لما بيشوفو يا عم يقولولك دا مش مطابق للمواصفات و مش عارف اية و يطلعولك الى مايطلعش و يقعدو يحبطوا فينا

احمد: ايوة مهو دا عشان صحة الى بياخد الدوا عشان لو فية اثار جانبية ولا حاجة

شينيو: ياعم جانبية اية و دائرية اية بقولك مختبرينةةةة و العيال اهى زى الفل ادامك و الناس بتاخد مافيش حاجة..معادا بس واد عندنا جالو شلل و فشل كلوى و انحبسات كدا و بيتعالج دلوقتى..بس هوا اصلا واد هفتان كدا دا عشان مابيكلش بس مش عشان حاجة ياعنى ..بعدين احنا مش سايبنية متابعينة بردو

احمد: بس الحجات دى درستوها فى الجامعة ولا دى من اجتهادكو.

شينيو: لا من اجتهادنا طبعا هوا حد بيخرج دلوقتى فاهم حاجة يا عم الواحد بيلزق الكمتين فى دماغة و يروح يطلعهم فى الامتحان و خلاص و شكرا على كدا دا مرة الدكتور بتاعنا ادانا درس جغرافيا يا عم فى محاضرة و قعد يقنعنا ان كردستان دى حالة صرع و ان جزر القمر دى حقنة..

احمد: ربنا يستر على الشباب

احمد: طيب شكرا ابوحميد و شينيو و نتمناكلم التوفيق و مبروك مقدما على افتتاح الفرع التانى من الصيدلية.



و فى نهاية البرنامج شفنا مع بعض زبون بيتقرطس و ناس بتاخد اى حاجة فى اى حاجة و توصيل طلبات و تعليم زى الفل..نتمنى لكم مشاهده ممتعة و طيبة وبجد شرفتونا
كان معكم محدثكم احمد (pit_bull) من امام.......
صيدلية(الهلاك)

تششش

المصور: بقولك يا دكتور انا حاسس بدوخة من الحر و الشمس الحقنى

ابوحميد:تعالى يابنى ورايا لما اديلك حقنة عضل

احمد: لالالالالالالا المصور بتاعى دنا لو روحت من غيرو اترفد ..,.اصور ازاى بعد كدا

شينيو: يا عم سيبو دا هايريحو...

بس قلت اية مش هاتاخد الازازة ولا اييييييية


انا للة و انا الية راجعون

الفاتحة للمصور

الى القاء فى الحلقة القادمة

ولا الضاليييييييييييييييييييين اميييييييييييييييييييين
هههههههههههههههه
ايوة ايوة انا عارفة الصيدلية دى
دى لازقة فى عم عتريس بتاع الفول جارنا
بس صيدلية اية تمامووووووووووز ومشهورة اوى ومحدش بيشتكى منها خااااااااااااااالص
اللى بدخلها بيرتاح (راحة ابدية...... راحة ومش راجعة تانى)
يلا اى خدعة بعملكوا دعاية اهو
بس توبيك هايل يابيت بول تسلم ايدك

ههههههههههههههههههههههههه

طب و الله د
ا المشروع اللى بنفكر فيه يا احمد بس اسمها صيدليه عم احمد مش هلاك و كلام من دا

و بالنسبه للازازه هعملك خصم 10 % و اكتر من كدا و الله يا بيه تبقا وقفه علينا بخساره و مش جايبه تمنها دانا مكسبى فى النص جنيه اللى انت مستخسره دا

و على فكره ميرو شغاله معانا فى الصيدليه يعنى بتشرف على العيال فى المختبر مع انى بتحايل عليها تجيب شنطه عده و تشتغل معايا دانا بلملى حوالى 20 جنيه تبس فى اليوم بس هيا بتخاف من الحقن

و اى حاله مرضيه اى دوا كلمونا على رقم الصيدليه بس الحراره مرفوعه الوقتى هندفع الفاتوره و نجبلكم الرقم

تحياتى

انت جامد يا برنس